احساسِ جرم، اعترافِ جرم
سرنگ کی کھدائی حکومت کی توقعات اور پراجیکٹ منیجر کی خواہشات کے مطابق ہو رہی تھی‘سرنگ کا ایک بڑا حصہ مکمل ہو چکا تھا‘ تین سال مکمل ہونے میں چند دن تھے کہ پراجیکٹ انچارج کو شک ہوا کہ سرنگ کے دونوں سرے شاید آمنے سامنے نہیں رہے اور پھر وہ دن بھی آ گیا جب سرنگ کی کھدائی مکمل ہونا تھی لیکن ایسا نہ ہو سکا۔ مقررہ دن گزر چکا تھا۔ اگلے روز مایوس انگریز انجینئر نے حسرت بھری نظر اپنے پراجیکٹ پر ڈالی اورایک طرف چل دیا۔ ادھر وہ نظروں سے اوجھل ہوا ادھر ایک کانکن کی کدال نے سرنگ کے دونوں حصوں کے درمیان کھڑی دیوار میں سوراخ کرڈالا۔ ایک دن کی تاخیر سے انجینئر کا منصوبہ کامیابی سے ہمکنار ہوا ۔ ایک نوجوان کدال سے آرپار ہونے والے سوراخ کو دیکھ کر انجینئر کو خوش خبری سنانے کیلئے بھاگا لیکن اسکے پہنچنے سے قبل ہی عظیم انجینئر خودکشی کر چکا تھا۔ محض ایک دن کی تاخیر کو وہ اپنا جرم سمجھا اور اس احساس جرم کے باعث اس نے اپنی جان لے لی۔ ہمارے ہاں ہر پراجیکٹ اپنی اصل مدت سے دو تین گنا زیادہ تاخیر اور اخراجات کا شکار ہو جاتا ہے لیکن کسی کے دل میں احساسِ جرم نہیں جاگتا۔ 8.5 کلومیٹر چترال کو دیر سے براہ راست ملانے والی لواری ٹنل کی تعمیر 1956ءمیں شروع ہوئی جو آج بھی زیر تکمل ہے۔
ہمارے ہاں بڑے بڑے جرم ہوتے ہیں لیکن احساس جرم نہیں ہوتا۔ احساس تو تب ہو اگر نیت صاف ہو۔ جرم کو جرم سمجھا ہی نہیں جاتا۔ ہر پراجیکٹ کو کمائی کا ذریعہ سمجھ کر شروع کیا جاتا ہے۔ پلاننگ کے تحت قومی وسائل پر ہاتھ صاف کرنے کو اپنا حق سمجھا جاتا ہے۔ آئین کی پروا نہ قانون کی پکڑ کا خوف ہے۔
قوم کے رہنماﺅں اور بیوروکریٹس کے جرائم کے عدم احساس نے قوم و ملک کی ترقی و خوشحالی کی راہیں مسدود کر دیں۔ عوام کو بحرانوں کے جنجال میں پھنسا دیا‘ ان کو انجام تک کیوں نہ پہنچا یا جائے! آئین اور قانون کو پائمال کرنے والا سب سے بڑا مجرم قانون کی گرفت میں ہے۔ وہ اور اسکے ساتھی ملک اور قانون کے شکنجے سے باہر نکل نہ پائیں۔سپریم کورٹ اپنا شکنجہ مزید سخت کردے۔
تین نومبر 2007ءکو ایمرجنسی پلس کا نفاذ چیف آف آرمی سٹاف کے حکم نامے پر ہوا۔ حکم نامے کے مطابق ”وزیراعظم، چاروں گورنرز، چیئرمین جوائنٹ چیفس آف سٹاف کمیٹی، مسلح افواج کے سربراہوں وائس چیف آف آرمی سٹاف اور تمام کور کمانڈرز کے ساتھ اجلاس میں ساری صورتحال کا جائزہ لیا گیا چنانچہ ان اجلاسوں کی کارروائی اور فیصلوں کے مطابق آرمی چیف (جنرل پرویز مشرف) نے پورے ملک میں ایمرجنسی کا فرمان جاری کیا“
3 نومبر کے اقدام کو سپریم کورٹ نے 31جولائی 2009ءکو غداری قرار دیا جس کی پاداش میںاب سپریم کورٹ ان پر مقدمہ چلانے کا ارادہ باندھ چکی ہے لیکن 3 نومبر 2007ءکا جرم اس جرم کے مقابلے میں کوئی حیثیت نہیں رکھتا جو جنرل مشرف نے جمہوری اور منتخب حکومت کا تخت الٹا کر کیا تھا۔ 12 اکتوبر اور 3 نومبر کے جرم میں زمین آسمان کا فرق ہے۔ یہ بالترتیب قتل کے مقابلے میں بازو مروڑنے کے مصداق ہے۔ آج بازو مروڑنے پر مشرف کو تختہ دار پر چڑھانے کی تیزی دکھائی جا رہی ہے۔ جس جرم کے تحت ان پر آرٹیکل 6 کا اطلاق ہو سکتا ہے اس کو نظرانداز کیا جا رہا ہے۔ قاتل کو معاف کرنے سے اسکی سزا ختم ضرور ہوتی ہے ،اقدام یعنی وقوعہ ختم نہیں ہو سکتا۔12 اکتوبر 1999ءکا اقدام صریحاً آئین شکنی اور قانون کا قتل ہے۔ اس میں جو بھی جس حیثیت میں بھی شامل رہا مجرم ہے۔ مشرف کے ساتھی جرنیل محمود، عثمانی اور دیگر مشرف جیسے ہی آئین شکن ہیں جنہوں نے مشرف کی غیر موجودگی میں ان کیلئے سٹیج تیار کی۔ آئین شکنی کو جائز قرار دینے والے ججوں کے پاس ایسا کرنے کا کیا جواز تھا اور پھر وہ سیاستدان بھی مجرم ہیں جو مشرف کی غلامی کا ڈھول بجاتے رہے۔ مشرفی آمریت کی حمایت کرنے اس کو جائز قرار دینے والے یقینا مجرم ہیں۔ جنرل ضیاءالحق اور انکے ساتھیوں نے بھی یہی کچھ کیا‘وہ اس کیٹگری سے باہر کیوں رکھے جائیں؟ ایوب خان اور انکے ساتھیوں کو کیوں بخشا جائے۔ سپریم کورٹ اگر دس بارہ ہزار آئین شکن سیاستدانوں، جرنیلوں، ججوں اور بیوروکریٹس کے گلے پھندا ڈال دیتی ہے تو معاشرہ ہمیشہ کیلئے غلاظت سے پاک ہو سکتا ہے، یہ خسارے کا سودا نہیں۔ ہمیں تباہی کے گڑھے میں گرنے سے صرف او رصرف ایسا یا اس جیسا اقدام ہی بچا سکتا ہے۔ اس سے شاید کسی کو بھی اختلاف نہیں ہو گا شاید ان کو بھی نہیں جن کی اپنی نسلوں کی بہتری کیلئے پھندے میں اپنی گردن آ رہی ہو گی۔ البتہ ہزاروں گردنیں بچ سکتی ہیں اگر وہ لوگ احساس جرم اور اعتراف جرم کرکے قوم سے معافی مانگ لیں ، قومی خزانے سے لوٹی اور اپنے اوپر استعمال ہونے والی پائی پائی واپس کر دیں۔
No comments:
Post a Comment